Рекомендуем
Top

Доруобуйа харыстабылын наркома, сахалартан бастакы анал үөрэхтээх рентгенолог быраас Сэргээнэй Уола

Михаил Степанович Григорьев-Сэргээнэй Уола, Таатта уонна саха бастакы көлүөнэ быраастарыттан биирдэстэрэ, III Игидэй нэһилиэгэр Илин Чуйуку алааһыгар олохтоох Степан Андреевич уонна Дария Григорьевна Григорьевтар дьиэ кэргэттэригэр 1891 cыллаахха төрөөбүтэ. Степан Андреевич Григорьев, дьоҥҥо-сэргэҕэ биллэринэн Сэргээнэй ‒ отоһут, түөнньүт, уутунньук (уоспа быһааччы) идэлээҕэ. Кинини аҕата Хохоруйа оҕонньор протоиерей Д.Д. Попов чааһынай оскуолатыгар үөрэттэрэн, нууччалыы көҥүл ааҕар-суруйар, иҥнигэһэ суох саҥарар буолбут. Үөрэҕи-сырдыгы өрө туппут, аатын курдук сэргэх киһи Тааттанан, Байаҕантайынан уоспаны быһан, өр сылларга сыраласпыт. Политсыылынайдары кытта доҕордоспут, ордук Э.К. Пекарскайдыын арахсыспат атастыылар буолбуттар.

Бу туһунан 2020 сыллаахха «Таатта» хаһыакка Михаил Степанович Григорьев сиэнэ Мария  Решетникова-Арылы Дуйдаах, Медицина национальнай киинин үрдүк категориялаах бырааһа, Клиническэй центр тэрийэр-методическэй салаатын сэбиэдиссэйэ, СР суруйааччыларын сойууһун чилиэнэ ыстатыйа суруйбута.

Пекарскай тылдьытын оҥорсубут Сэргээнэй

Кыраайы үөрэтээччи Егор Андросов оҕо сылдьан кинини көрөр эбит. «Сэргээнэй оҕонньор, туох да нууччалыы-сахалыы тыбыырбыт, олорбут-турбут, саҥарбыт-иҥэрбит сүрдээх сэргэх киһи этэ. Баайаҕаҕа кэллэҕинэ тииһэ барыта кыһыл көмүс бүрүөһүннээҕин толло көрөрүм. Миигин эмиэ уоспаттан быспыта. Пекарскай тылдьытыгар, аата суруллубатар да, өрүү аттыгар сылдьан үлэлэспит улахан үтүөлээх. Пекарскай куоракка көһөн баран, тылдьытыгар салгыы көмөлөһүннэрээри Сэргээнэйи ыҥыран ылан, икки оҕотун пансиоҥҥа олордон куоракка үөрэттэрбитэ. Эн сэргээнэйдэр дьүһүннэрин илдьэ сылдьаҕын. Эһэҥ Михаил Степанович наһаа сымнаҕас майгылаах, киэҥ билиилээх дьиҥнээх интеллигент этэ. Ытык Күөлгэ үлэлиирин саҕана, мин эдэр эрдэхпинэ билсэр, үгүстүк сэлэһэр буоларым. Онно төрүт улахамсыйбат этэ. Кини, сэрии сылларыгар Садын оройуонугар Туой Хайаҕа билсибит доҕотторугар ‒ Мөрүөн Маайалаахха дьиэлэнэн олорон өлбүтэ. Улаханнык ыалдьыбытыгар Дьокуускайтан Доруобуйа харыстабылын миниистирэ Павел Васильевич Любимов сөмөлүөтүнэн ылларан Дьокуускайга киллэрбитэ да, ыарыыта улаатан хаалбыт этэ. Павел Васильевич доҕорун улаханнык аһыйан, чиэстээн, уҥуоҕун туттарбыта», ‒ диэн кэпсиирэ.

Егор Дмитриевич эһэбин уонна хос эһэбин сөбүлүүрэ, ытыктыыра бэрдиттэн, миэхэ сыһыана кинилэр сырдык мөссүөннэрин нөҥүө сымнаҕас, истиҥ курдуга. Историяны хасыһан дьарыктанарбар, биир даҕаны улахан алҕаһы тутуспута да, сэмэлээбитэ да суоҕа. Саас ылан, архыыпка сылдьыбат киһи, булумньуларбын сүрдээҕин сэргиирэ, Байанайдаах булчут курдуккун диэн үөрэрэ. Дьиэтигэр тиийдэхпинэ остуолун тардан чэйдэтэрэ, ол кэннэ дьыбааныгар кэккэлэһэн олороммут хас эмэ чааһы быһа кумааҕыларбын ырытарбыт. Ааҕар кэммэр кыбытыылары, чопчулааһыннары киллэрэрэ. Бэйэтин архыыбыттан хаартыскалары, докумуоннары итэҕэйэн уларсара.

Байыаннай биэлсэр

С.А. Григорьев-Сэргээнэй оҕонньор ол курдук куоракка чугаһаан, Мэҥэ Хаҥаласка көһөн олохсуйан, оҕолорун үөрэттэрбит. Сүөһү ииттэн, саалтыыр ааҕан айаҕын ииттибит. Биэс оҕотуттан улахан кыыһа Мааппа I эрэ үөрэммэтэх, дьонугар, бииргэ төрөөбүттэригэр көмөлөһөн, бассабыык сыылынайдарга ‒ Пекарскайдарга, Кирсановаҕа эстэрээпэлээбит, оҕо көрсүбүт. Михаил Степанович 1913 cыллаахха оскуолатын бүтэрэн (бэйэтэ в Усть Соле диэн суруйар), Пекарскай көмөтүнэн Дьокуускайдааҕы 4 кылаастаах училище педагогическай куурсугар үөрэнэ киирбит. Онтон Педкурс учительскай семинарияҕа уларыйбытын кэннэ уурайан, Дьокуускайдааҕы фельдшерскэй-акушерскай оскуолаҕа үөрэнэн, 1920 c. бүтэрбит. Ити кэнниттэн биэлсэринэн, бастаан Өлүөнэ өрүскэ балык промышленноһыгар, Амма балыыһатыгар үлэлиир. 1921-1923 cс. гражданскай сэриигэ Кыһыл армия кэккэтигэр К.М. Котрус этэрээтигэр байыаннай биэлсэринэн сылдьар. Кини бойобуой суола Амманан, Абалааҕынан, Кубалааҕынан, Ян-Нильканынан, Уус Майанан, Петропавловскайынан, Төхтүрүнэн, Киллэминэн, Күбүнэн ааспыта. Амма Солобуодатыгар сыл аҥаарын кэриҥэ үрүҥнэр төгүрүктээһиннэригэр түбэһэннэр, биир киһи хаалыар диэри бэриммэккэ кыргыһарга андаҕайан туран сэриилэспиттэр. Манна көрдөрбүт хорсун быһыытын, гражданскай сэриигэ эмчит уонна буойун быһыытынан уһулуччу үтүөлэрин иһин, ЯЦИК председателэ А.К. Андеев сүбэтинэн Москваҕа үөрэнэ барара быһаарыллыбыт. Кэлин 1932 с. САССР 10 cыллаах үбүлүөйүгэр ЯЦИК бочуотунай грамотатынан наҕараадаламмыта.

Алампа доҕоро

Михаил Степанович сэрии кэнниттэн, 1923 c. аҕыйах ый Чөркөөххө биэлсэрдээбитэ, кыра балта Марфа Степановна II сиэстэрэлээбитэ. Онтон 1923-1930 сс. Москваҕа II Медицинскэй институкка үөрэммитэ. Устудьуоннуур сылларыгар саха интеллигенциятын, онно үөрэнэр, үлэлиир Таатта дьонун кытта элбэхтик алтыспыта. Дьылҕата умнуллубат күннэри-дьыллары тосхойбута. Холобур, Г.В. Егоровы-Бартыһаан Дьөгүөрэби М.И. Калиниҥҥа уонна К.Е. Ворошиловка киирэригэр иккитэ Кремльгэ тылбаасчытынан арыаллаабыта. Ол туһунан Амма Аччыгыйын, Е.Д. Андросов ахтыыларыгар ааҕыахха сөп. Михаил Степанович ити сырыыларын туһунан оччолорго Москваҕа баар саха суруйааччыларыгар кэпсээбитэ («тандинская дорога бырыы да бадараан…» о.д.а.) норуокка уос номоҕор хаалбыта.

Бииргэ төрөөбүт Григорьевтар А.И. Софроновы кытта чугастык билсэллэрэ, Дьокуускайга кини дьиэтигэр хонор, олорор да эбиттэр. Михаил Степанович Алампалыын Москваҕа Өксөкүлээх Өлөксөйү ыарыыласпыт, көмүс уҥуоҕун көтөхсүбүт, тиһэх суолугар атаарсыбыт. Тиһэх күннэригэр улуу убайа киниэхэ кэриэһин дуу, көрдөһүүтүн дуу курдук маннык эппит: «… Мэхээлэ, доҕоор, эн биһиги өбүгэлэрбит саҕаттан эттиин-хаанныын, тыллыын-өстүүн, өйдүүр өйдүүн, саныыр санаалыын дьиҥнээх саха дьон буоллахпыт дии, дьэ, онон эн, бу эмчит үөрэҕин бүтэрээри сылдьар киһи, төрөөбүт төрүт силискиттэн- мутуккуттан адьас тэйимэ. Хараҥа олоххо хам баттатан, чысхааннаах тымныылаах уһук хоту дойдуга да олордоллор, саха отһуттара, эмчиттэрэ барахсаттар, төһөлөөх үгүс саха дьонун бэйэлэрин билэр ньымаларынан эмтээннэр-томтооннор, отоһуттааннар үрүлүйэр үрүҥ тыыннарын өрүһүйбүттэрэ буолуой, харалыйар хара тыыннарын харайбыттара буолуой? Онон эн, хайаан да норуотуҥ эмчиттэрин эмтиир ньымаларын, сириэстибэлэрин сыныйан үөрэттэххинэ, инники үлэҕэр улахан көмөлөөх, туһалаах да буолуон сөп». Ону толорон Михаил Степанович бобуу-хаайыы баарын үрдүнэн, кистээн, сэрэнэн саха отоһуттарын эмтиир ньымаларын хам-түм туттарын туһунан Е.Д. Анросовка кэпсээбит.

Бэйэм сабаҕалааһыммынан, эмчит идэлээх киһи оччоттон баччаҕа диэри дьонугар- сэргэтигэр эмтэнэр кыһалҕа тирээтэҕинэ, суолу-ииһи тобулааччы, сүбэ-ама биэрээччи солотуттан төлөрүйбэт үгэһинэн, Михаил Степанович Алампа кэргэнэ Евдокия Спиридоновна Москваҕа эмтэнэригэр көмөлөспүтэ буолуо дии саныыбын. Үөрэҕиттэн эргиллиитигэр, гражданскай сэрии кыттыылааҕын, ревкомовец Е.И. Сунхалыров Москваҕа эмтэнэ тиийбитигэр ыарыыласпыт уонна өлбүтүн кэннэ уматтаран, күлүн уурунаҕа уган Тааттаҕа, ийэ буоругар аҕалан кистэппит.

Доруобуйа харыстабылын наркома 

М.С. Григорьев быраас быһыытынан үлэтин Тааттаҕа Чөркөөх балыыһатыгар саҕалаабыта. Саҥардыы үлэлээн иһэн, 1930 с. сэтинньи 16 күнүгэр П.А. Ойуунскай оннугар САССР Доруобуйатын харыстабылын наркомунан анаммыта. Бу дуоһунаска 1931 c. алтынньытыгар диэри үлэлээн баран, биир дойдулаахтарын туруорсууларын ылынан, саҥа тэриллибит Таатта оройуонугар доруобуйа харыстабылын салаатын бастакы медицинскэй үөрэхтээх сэбиэдиссэйинэн (райздравынан) ананан көһөн тахсар. Кини иннинэ кылгас кэмҥэ райздрав маҥнайгы сэбиэдиссэйинэн П.А. Ойуунскай балта М.А. Слепцова үлэлээбитэ.

Эмтиир эйгэ сайдыытыгар М.С. Григорьев чуолаан тугу оҥорбутай, туох суолу-ииһи хаалларбытай диир буоллахха маннык:

  • кини П.Н. Сокольников кэнниттэн Тааттаттан төрүттээх иккис быраас этэ;
  • САССР доруобуйатын харыстабылын наркома (1930-1931 сс.) ‒ Саха сиригэр сэбиэскэй медицина ситимин тэрийиигэ, балыыһалары тутууга, ыраас олоҕу көҕүлээһиҥҥэ, сыстыганнаах ыарыылары утары охсуһууга, оскуола саастаах оҕолор доруобуйаларын чинчийиигэ, о.д.а. хайысхаларга туһааннаах үлэлэри ситэрэн ыыппыта;
  • наркомнуу олорон, кэлин Саха сирин фтизиатриятын аҕалаатар аҕата буолуохтаах М.Ф. Щепетовы Хаҥалас балыыһатыттан Москваҕа ыытан үөрэттэрэн, Дьокуускайга тубдиспансер кылаабынай бырааһынан анаабыта. Михаил Флегонтович рентгенология сайдыытыгар, сэллиги утары охсуһууга уһулуччу үтүөлээх бөдөҥ учуонай, медицинскэй наука доктора, доруобуйа харыстабылын салайааччы, аатырбыт сэллик бырааһа буолбута;
  • төрөөбүт дойдутун кырдьаҕас балыыһаларын үтүөкэннээх каадырдарынан хааччыйбыта. Ол

курдук Баайаҕаҕа И.И. Исаков, Чөркөөххө Г.М. Кокшарскай курдук киэҥ билиилээх, сайдыылаах быраастар кэлэннэр үрдүк таһаарыылаахтык үлэлээбиттэрэ, Тааттаҕа эмтиир дьыаланы өрө көтөхпүттэрэ. Оччолорго, эмчит букатын тиийбэт кэмигэр, кинилэр Дьокуускайга эбэтэр киэҥ нэлэмэн Саха сирин ханнык баҕарар улахан оройуоннарыгар ананыахтарын сөптөөҕө;

  • П.А. Ойуунускай саҕана, 1928 c. саҥардыы тэриллибит рентгенология салаатын ‒ Дьокуускайдааҕы рентген-кабинеты Т.Ф. Сердюков уонна Ф.И. Кукс диэн икки рентгенолог бырааһынан тэҥинэн хааччыйбыта. Бу улахан суолталаах аныгы чинчийии көрүҥүн сайдыытыгар дьоһуннаах хардыы этэ;
  • Таатта улууһугар бастакы эмчит идэлээх райздрав сэбиэдиссэйэ буолбута (1931-1933 );
  • Ытык Күөлгэ оройуон балыыһатын төрүттээччи, бастакы балыыһа комплексын туттарбыт салайааччы:
  1. Улахан утарсыыны көрсөн туран, 1932 c. Уолбаҕа арыллыахтаах биэлсэрдээх пууну Ытык Күөлгэ көһөрөрү ситиһэр. Аҕабыыт Иннокентий Васильевич Попов көмөтүнэн кини дьиэтигэр амбулатория, аптека, аҥаарыгар эмчит олорор уопсайын тэрийэр.

Бэйэтэ үлэтин бастакы икки ыйыгар оройуон бары оскуолаларын, колхозтарын кэрийбитэ, 1023 ахсааннаах «Ыраас олох» кинигэлэрин тарҕаппыта. Баайаҕа, Чөркөөх, Кириэс Халдьаайы балыыһаларыгар иккилиитэ-үстүүтэ тиийбитэ. Оройуоҥҥа доруобуйа харыстабылын сайдыытын анал былаанын оҥорбута. Бары оскуолаларга 8-15 саастаах оҕолор доруобуйаларын чинчийии ыытыллыбыта. Ити сиһилии чинчийии түмүктэрэ архыыпка бааллар, билиҥҥини кытта тэҥнээн үөрэтэргэ бэртээхэй материал буолуохтара этэ. Бу кэмҥэ аан бастаан оскуолаларга итии аһылык уонна аптечкалар тэриллибиттэрэ. Быраастар уонна лекпомнар колхозтарга ыйга иккитэ, ыраах учаастактарга биирдэ сылдьыыларын, төрүүр дьахталлары бырааска көрдөрүүнү саҕалаабыттара. Григорьев бэйэтэ тустаах дьиэтэ-уота суох, РИК хонтуоратыгар кыра хоско кыбыллан олорбута. М.С. Григорьев, Г.М. Кокшарскай, И.И. Исаков, П.С. Шуляренко, художник И.В. Попов биир сомоҕо буоланнар, оройуоҥҥа киэҥ өрүттээх сырдатар уонна эмтиир үлэни саҕалаабыттара.

  1. Ытык Күөлгэ тутуллуохтаах оройуон балыыһатын барылын, үбүн-харчытын ааҕан 1932 c. оҥорбута. Балыыһа комплекса терапевтическай, хирургическай, родильнай отделениелаах, сыстыганнаах ыарыылаахтарга туспа куорпустаах, анатомическай покойдаах (морг), баанньыктаах, ампаардаах, эмчиттэр олорор дьиэлээх буолуохтааҕа. Ытык Күөлгэ бастаан 1942 c. амбулатория уонна сытар балыыһа дьиэлэрэ тутуллубуттара. Онтон М.С. Григорьев 1950 с. дойдутугар эргиллэн кэлэн баран, өр сылларга ыра санаа гыммыт балыыһатын комплексын туруорсубутунан барбыта. Ол курдук 1951 сылтан саҕалаан райздрав сэбиэдиссэйинэн уонна 35 куойкалаах оройуон балыыһатын комплексын тутуу салайааччытын быһыытынан (председатель медсантруда по строительству, распредкредит равления райсовета) олоҕун тиһэх күннэригэр диэри үлэлээбитэ. Манна кини медицинаҕа өр үлэлээбит уопута, аптарытыата, Дьокуускайга салалтаны үчүгэйдик билэрэ туһалаабыта биллэр суол. Ордук өр сылтан доҕоро, миниистир П.В. Любимов уонна наркомздравка (министерствоҕа) уһуннук үлэлээбит П.Е. Кулаковскай көмөлөрө улахан буолуохтаах. Хомойуох иһин, комплекс арыллыан эрэ иннинэ, Михаил Степанович куртах искэнэ буолан, олохтон туораабыта. Ол эрээри, бэйэтин кэмигэр Саха сирин биир баараҕай, бастыҥ балыыһатын комплексын тутууну кыайбыта, баҕа санаатын толорбута. Кини кэнниттэн бу тутуулары кылаабынай быраас Д.Т. Брыскаев, райздрав сэбиэдиссэйэ М.С. Белолюбскай тиһэҕэр тириэрдибиттэрэ. Билигин ол дьиэлэр эргэрэннэр, инфекционнай куорпус эрэ ордон туһалыы турар.
  2. 1950-с сылларга доруобуйа харыстабылын сүрүн салаалара (терапия, хирургия, акушерство, педиатрия, стоматология) специалистанан, куойкаланан туспа арахсан сайдан барбыттара. Соҕуруу уобаластартан элбэх ахсааннаах үрдүк уонна орто үөрэхтээх эмчиттэр үлэлии кэлбиттэрэ.
  3. 1951 Ытык Күөлгэ 5 куойкалаах тубдиспансер арыллыбыта.
  4. Таатта бастакы офтальмолог бырааһа (1950-1954 сс.).
  5. Тааттаҕа бастакы рентген-аппараты үлэҕэ киллэрсибитэ (1950 c.).
  • Саха сирин оройуоннарыгар доруобуйа харыстабыла сайдыытыгар тус кылаатын киллэрбитэ. Ол курдук Уус Алдаҥҥа (1933-1935 cc.), Горнайга (1935-1939 сс.), Садыҥҥа (1942-1948 сс.) райздрав сэбиэдиссэйинэн, бастакы бырааһынан, Дьабарыкы Хайаҕа (1949 с.) балыыһа сэбиэдиссэйинэн күүһүн-кыаҕын барытын ууран туран, үксүгэр уоппуската суох тилэри үлэлээбитэ. «1941-1945 cc. Аҕа дойду улуу сэриитин кэмигэр килбиэннээх үлэтин иһин» мэтээлинэн (1946 c.), САССР 25 cылын көрсө Доруобуйа харыстабылын министиэристибэтин личнэй дьыалаҕа суруллар махталынан бэлиэтэммитэ (1947 с.);
  • сахалартан бастакы анал үөрэхтээх рентгенолог быраас буолан историяҕа киирбитэ (1939- 1940 cc. Москваҕа үөрэммитэ, Дьокуускайга рентгенологынан үлэлээбитэ).

Чугас дьоно 

Таатта улууһугар эмтиир эйгэ сайдыытын торумнаспыт быраас, салайааччы Михаил Степанович Григорьев чугас дьонун туһунан өссө ахтан ааһар буоллахха, аҕата Сэргээнэй оҕонньор 1941 cыллаахха, ийэтэ Дария Григорьевна 1927 cыллаахха өлбүттэр. Бииргэ төрөөбүт убайа Микиитэ Бүлүүгэ, Өлүөхүмэҕэ учууталлаабыт, 1942 с. сэбиргэхтэтэн өлбүт. Быраата Көстөкүүн Дьокуускайга экономист-плановигынан үлэлээбит, 1950 с. инсультаан өлбүт. Кыра балта Мааппа II Дьокуускайга хирургическай сиэстэрэлээбит, 1947 c. сэллигинэн ыалдьан өлбүт. Улахан эдьиийэ Мааппа I Дьокуускайга олорбут. Икки Мааппаттан биирдэстэрэ отоһуттуур буолан, дойдутугар сойуолаһыыга түбэспитин туһунан суругу архыыпка көрбүттээхпин. Кинилэртэн туох оҕо, ыччат хаалбыта биллибэт. Михаил Степанович соҕотох уола, эһэтин аннынан суруллубут Афанасий Кононович Алексеев билигин 85 саастаах педагогическай үлэ бэтэрээнэ, саха тылын, литературатын уонна историяны үөрэппит учуутал, кыраайы үөрэтээччи, прозаик, РФ суруналыыстарын сойууһун чилиэнэ, элбэх кинигэ ааптара, оҕолоругар Дьокуускайга олорор. Афанасий Кононович ийэтэ Матрена Кононовна Алексеева

  • Уус Алдан улууһун Түүлээх нэһилиэгин бастакы үөрэхтээҕин, эмиэ өр сылларга уутунньугунан үлэлээбит саха саарынын Конон Степанович Алексеев-Уутунньук Куонаан соҕотох кыыһа этэ. Онон Сэргээнэй оҕонньор уонна Уутунньук Куонаан, өр кэмҥэ ыаллыы улуустары эмтээбит, бэйэ-бэйэлэрин билсэр дьоннор диэн сабаҕалыахха сөп. Матрена Кононовна тоҕо Михаил Степановичтыын олоҕун холбооботоҕо биллибэт, кэлин кэргэн тахсыбатах. Бииргэ төрөөбүт убайа учууталын батыһан үрүҥнэргэ суруксутунан сылдьан эдэр сааһыгар өлүүтэ, аҕата баай, кинээс диэн куоластыыр бырааба быһыллан, бойкуоттаммыт кулаак аатыран үгүстүк үтүрүллүүтэ, кулаак оҕото буолан, аҕата туттарбыт, арыйтарбыт оскуолатыттан үүрүллэн үөрэхтэн матыыта, ийэтэ өлөн ыарыһах аҕатын кытта соҕотох хаалыыта о.д.а. ыал үгүс күчүмэҕэйдээх олоҕо төрүөт буолбута дуу диэн сэрэйиэххэ сөп. Баҕар, репрессия ыар тыына биллибит кэмигэр, бэйэтэ да сиртэн-сиргэ тэлэһийэн сылдьар эппиэттээх үлэлээх быраас, салайааччы киһиэхэ, күлүк түһүүлээх дьылҕалаах кыыс кэргэн тахсара табыгаһа суоҕа дуу диэн толкуй баар. Дойдутуттан арахсар санаата суох кыыстан сылтаан, Григорьев Түүлээххэ быраастаах балыыһаны арыйтарыан баҕарбыта да, ол олоххо хайдах да киирбэт туруктааҕа диэн кэпсээн эмиэ баар. Е.Д. Андросов, Михаил Степанович, Тааттаҕа репрессия ыар тыына биллэн эрэрин этинэн-хаанынан сэрэйбит курдук, Уус Алдаҥҥа көрдөһөн барбыта диэн суруйбута. Туох билиэй?.. Икки үчүгэй дьон ол курдук сулумах олорон аастахтара… Михаил Степанович, уолун улаатыта булан, суруйса сатаабытын, эдэр оҕо киһи уолҕамчы санаатыгар хардарбатах буруйугар, кэлин сааһыран баран бэйэтэ ирдэһэр, Тааттаҕа сылдьар, Е.Д. Андросовтыын, атын да кырдьаҕастардыын билсэр, аҕатын туһунан сураһар, үөрэтэр этэ.

М.С. Григорьев сиэннэриттэн эмчит идэтин талбыт соҕотох мин эбиппин. Медицина историятын чинчийии дьарыга тиксэн хаалбыта эмиэ кинилиин ситимнээх. Ол курдук кылаабынай бырааһым П.Д. Дьячковскай уонна наставниктарым А.И. Захарова, К.М. Егорова

«эһэҥ төрүттээбит балыыһатын эн суруйуохтааххын» диэнннэр улахан соругу сүктэрбиттэрэ, түһээн да баттаппатах үлэбэр сирдээн киллэрбиттэрэ. Оттон Михаил Григорьев араспаанньата уонна аата, сиэннэринэн сиэттэриллэн, хос сиэннэригэр ‒ сиргэ хаалбыт тыыннаах бэлиэлэригэр эргийэн кэлбитэ ‒ бэйэтэ туспа дьикти…

Быйыл, 2021 cылга, Михаил  Степанович Григорьев  төрөөбүтэ 130  cыла  буолар. Онон кини сэмэй аата илгэлээх Игидэйигэр, тапталлаах Тааттатыгар, төрүттээбит улуустааҕы балыыһатыгар, эмчит идэлээхтэрин ортотугар ахтыллыаҕа диэн эрэнэ саныыбын.

 

Комментарии